കരയരുത് ഉണരുവാന് സമയമായി: ഇന്ന് ലോക വനിതാദിനം
മുമ്പെങ്ങുമില്ലാത്തവണ്ണം അതിക്രമങ്ങള്, നിയമങ്ങളുണ്ടായിട്ടും സംരക്ഷണം ലഭിക്കാത്ത അവസ്ഥ, ഇതിനിടയിലേക്ക് ഒരു വനിതാദിനംകൂടി...
സ്ത്രീകളുടെ തുല്യത, പങ്കാളിത്തം, അവകാശം ഇവയെക്കുറിച്ച് ഓര്ക്കാനും ഓര്മപ്പെടുത്താനും ഒരുദിനം. കാലവും ലോകവും സ്ത്രീക്കായി കാത്തുവെച്ചത് കണ്ണീരല്ല. പോരാടാനുള്ള ഊര്ജമാണ്. കരയരുത്, ഇനി ഉണര്ന്നുയരൂ.
1971 മുതലാണ് ദേശീയ ക്രൈം റെക്കോഡ്സ് ബ്യൂറോ ബലാത്സംഗത്തിന്റെ കണക്കുകള് ശേഖരിച്ചുതുടങ്ങിയത്. അന്നുമുതല് 2011 വരെയുള്ള കണക്കനുസരിച്ച് ഇന്ത്യയിലെ ബലാത്സംഗക്കേസുകളിലെ വര്ധന 873.3 ശതമാനം! 1971-ല് 2,487 കേസുകള് രജിസ്റ്റര്ചെയ്ത സ്ഥാനത്ത് 2011-ല് രജിസ്റ്റര്ചെയ്തത് 24,206 കേസുകള്.
> കേരളത്തില് 2012 സപ്തംബര്വരെ മാത്രം സ്ത്രീകള്ക്കെതിരായ കുറ്റകൃത്യങ്ങളുമായി ബന്ധപ്പെട്ട് രജിസ്റ്റര്ചെയ്തത് 9,758 കേസുകള്.
> ലോകത്ത് അര്ബുദംബാധിച്ച് മരിക്കുന്നതിനേക്കാള് കൂടുതല് സ്ത്രീകള് (15-44 പ്രായമുള്ളവര്) ഒരു വര്ഷം ഗാര്ഹികപീഡനംമൂലം മരിക്കുന്നു. ഗാര്ഹികപീഡനംമൂലം അംഗഹീനരാവുന്നവര് വാഹനാപകടങ്ങളില് അംഗവൈകല്യം ബാധിക്കുന്നവരേക്കാള് ഏറേയാണ്. കേന്ദ്ര വനിതാ ശിശുക്ഷേമ മന്ത്രാലയം നല്കുന്ന കണക്കുപ്രകാരം 2011-ല് രാജ്യത്ത് രേഖപ്പെടുത്തിയ കേസുകള് 99,135. 2009-ല് രേഖപ്പെടുത്തിയ 89,546 കേസുകളേക്കാള് 10.7 ശതമാനം വര്ധന.
> ഗ്രാമീണമേഖലയില് തൊഴില് ശക്തിയുടെ 26.1 ശതമാനമാണ് സ്ത്രീകള്. നഗരത്തിലാകട്ടെ ഇത് 13.8 ശതമാനംമാത്രം. എന്നാല്, ഒരേമേഖലയിലെ ജോലിക്ക് സ്ത്രീക്കും പുരുഷനും ലഭിക്കുന്ന കൂലിയിലെ അന്തരം വലുതാണ്.
> ജനസംഖ്യയുടെ മഹാഭൂരിപക്ഷം സ്ത്രീകളായ രാജ്യത്ത് സര്ക്കാറിലെയും ജുഡീഷ്യറിയിലെയും സ്ത്രീ പ്രാതിനിധ്യം നാമമാത്രം. വനിതാസംവരണബില് ഇപ്പോഴും ഫയലിലുറങ്ങുന്നു.
> ഓരോ സെന്സസിലും കുട്ടികളിലെ സ്ത്രീപുരുഷാനുപാതം കുറഞ്ഞുകൊണ്ടിരിക്കുന്നു. 2001-ലെ സെന്സസില് ഇത് 1,000 ആണ്കുട്ടികള്ക്ക് 927 പെണ്കുട്ടികളായിരുന്നു. 2011-ലാകട്ടെ 1,000 ആണ്കുട്ടികള്ക്ക് 914 പെണ്കുട്ടികളായി കുറഞ്ഞു.
കുട്ടികളിലെ സ്ത്രീപുരുഷാനുപാതത്തില് ഇന്ത്യയില് ഏറ്റവും മുന്തിയസ്ഥാനം പുലര്ത്തിയിരുന്ന കേരളത്തിലെ സ്ഥിതിയും വ്യത്യസ്തമല്ല. 1,000 ആണ്കുട്ടികള്ക്ക് 959 പെണ്കുട്ടികള് എന്നതാണ് 2011 സെന്സസിലെ കണക്ക്.
കണക്കുകള് കണ്ണുതുറപ്പിക്കട്ടെ. അവളുടെ അവകാശങ്ങളും അവള്ക്കുനല്കേണ്ട ആദരവും ലഭിക്കട്ടെ. മാറ്റത്തിന്റേതാകട്ടെ ഈ വനിതാദിനം.
> ഇന്ത്യയില് ഓരോ 3 മിനിറ്റിലും ഒരു സ്ത്രീ ആക്രമിക്കപ്പെടുന്നു
> ഓരോ 29 മിനിറ്റിലും ഒരു ബലാത്സംഗം
> ഓരോ 25 മിനിറ്റിലും ഒരു മാനഭംഗം
> ഓരോ 40 മിനിറ്റിലും ഒരു തട്ടിക്കൊണ്ടുപോകല്
> ഓരോ 77 മിനിറ്റിലും ഒരു സ്ത്രീധന പീഡനമരണം
> ഓരോ 9 മിനിറ്റിലും ഒരു ഭര്തൃപീഡനം
കേന്ദ്രസര്ക്കാറിലെയും ജുഡീഷ്യറിയിലെയും സ്ത്രീകള്
> 75 അംഗ കേന്ദ്രമന്ത്രിസഭയില് 8
> സുപ്രീംകോടതിയിലെ 26 ജഡ്ജിമാരില് 2
> ഹൈക്കോടതികളിലെ 634 ജഡ്ജിമാരില് 54
ഈ വര്ഷത്തെ വനിതാദിന മുദ്രാവാക്യം
'വാഗ്ദാനം വാഗ്ദാനം മാത്രം: സ്ത്രീകള്ക്കെതിരായ പീഡനങ്ങള്ക്ക് അറുതിവരുത്താന് കാലമായി'