അതിരുവിടുന്ന സീരിയലുകള്
മലയാളം സീരിയല് പ്രേക്ഷകര് അതിക്രൂരമായ രീതിയില് സാംസ്കാരിക പീഡനത്തിന് വിധേയമായിക്കൊണ്ടിരിക്കുന്നു.
ജ്യോത്സ്യം, ആഭിചാരക്രിയകള് , വശ്യം, ശത്രുദോഷം, ശത്രുസംഹാരം, മാന്ത്രിക ഏലസ്സുകള് എന്നിവയുടെയും പ്രേതബാധ, പരകായപ്രവേശം ഉള്പ്പെടെയുള്ള പലതരം അന്ധവിശ്വാസങ്ങളുടെയും മൊത്തക്കച്ചവടക്കാരും പ്രചാരകരുമായി മാറിയിരിക്കയാണ് മലയാളത്തിലെ പല ചാനലുകളും.
സീരിയലുകളാണ് ഇവരുടെ പ്രധാന പ്രചാരണോപാധി.
സാഹിത്യരംഗത്തോ ആനുകാലിക പ്രസിദ്ധീകരണ രംഗത്തോ സിനിമാരംഗത്തോ ജീര്ണതകള് കാണുമ്പോള് വിമര്ശിക്കുകയും പ്രതികരിക്കുകയും ചെയ്യാറുള്ള നിരൂപകരും സാംസ്കാരിക നായകരും ബുദ്ധിജീവികളും ചാനലുകളുടെ സാംസ്കാരിക പീഡനത്തിന് എതിരെ മൗനം പാലിക്കുന്നത് ദുരൂഹമാണ്.
ഫലപ്രദമായ നിരീക്ഷണങ്ങളോ നിയന്ത്രണങ്ങളോ ഇല്ലാത്തതുകൊണ്ടാവാം സീരിയലുകളില് ഭൂരിഭാഗവും സാംസ്കാരിക അധ:പതനത്തിന്റെ അഗാധതയില് എത്തിയിരിക്കുന്നു.
മാതാപിതാക്കളെ എങ്ങനെ അനുസരിക്കാതിരിക്കാം, കുടുംബബന്ധങ്ങള് എങ്ങനെ ശിഥിലമാക്കാം, മറ്റൊരാളെ എങ്ങനെ ഉപദ്രവിക്കാം, നിയമത്തിന്റെ കണ്ണില്പെടാതെ എങ്ങനെ കുറ്റകൃത്യങ്ങള് ചെയ്യാം എന്നീ വിഷയങ്ങളില് ഗവേഷണം നടത്തുന്നവരായി മാറിയിരിക്കുകയാണ് പല സീരിയല് നിര്മാതാക്കളും സംവിധായകരും.
നമ്മള് കണ്ടും കേട്ടും അറിഞ്ഞിരുന്നതും അനുഷ്ഠിച്ചുപോന്നിരുന്നതുമായ സദാചാര മൂല്യങ്ങളുടെയും പരസ്പര സഹായത്തിന്റെയും മനുഷ്യസ്നേഹത്തിന്റെയും സര്വോപരി കുടുംബ ബന്ധങ്ങളുടെയും കടക്കല് കത്തിവെച്ചാണ് ഇത്തരം സീരിയലുകള് വിജയഗാഥകള് രചിക്കുന്നത്.
ഒരു കാരണവശാലും കളവു പറയരുത് എന്ന് പഠിപ്പിച്ച വിവിധ മതങ്ങളുടെയും സംസ്കാരങ്ങളുടെയും അനുയായികളായ നമ്മളെ സമര്ഥമായി കളവു പറയാന് പഠിപ്പിക്കുന്ന, അല്ലെങ്കില് പ്രചോദിപ്പിക്കുന്ന രംഗങ്ങള് ഏത് സീരിയലുകളിലും കാണാം.
നിയമവാഴ്ചയോടുള്ള വെല്ലുവിളികള് എല്ലാ സീമകളും ലംഘിച്ച് ആര്ക്കും എന്ത് കുറ്റകൃത്യങ്ങളും ചെയ്യാമെന്നും രക്ഷപ്പെടാന് സ്ഥലത്തെ പൊലീസ് ഓഫിസറെ സ്വാധീനിച്ചാല് മതിയെന്നും പൊലീസ് ഓഫിസര്മാരില് ഏറെപ്പേരും സ്വാധീനിക്കപ്പെടാവുന്നവരാണെന്നും മറ്റുമുള്ള സന്ദേശം കാണികള്ക്ക് നല്കുന്നതുവരെ എത്തിയിരിക്കുന്നു സീരിയലുകള് .
സീരിയല് പ്രേക്ഷകരില് ഭൂരിഭാഗവും സ്ത്രീകളും കുട്ടികളും അവരില് കൂടുതലും സാധാരണക്കാരും ആണെന്നുള്ളത് അവയുടെ സ്വാധീനത്തിന്റെ വ്യാപ്തി വര്ധിപ്പിക്കുന്നു.
സീരിയലുകളില് വ്യാപകമായി കണ്ടുവരുന്നതാണ് ക്വട്ടേഷന് സംഘങ്ങളുടെ അവതാരങ്ങള് .
സ്ത്രീകളും സ്കൂള് കുട്ടികളും വരെ പകപോക്കലിനായി ക്വട്ടേഷന് സംഘങ്ങളെ വാടകക്കെടുക്കുന്നതും അവര് വിജയകരമായി കൃത്യം നിര്വഹിച്ച് പിടിക്കപ്പെടാതെ പോകുന്നതുമായ രംഗങ്ങള് ആര്ക്കും ഒരു പ്രചോദനവും ഉണ്ടാക്കുകയില്ലെന്നും ആരെയും സ്വാധീനിക്കുകയില്ലെന്നും ചിന്തിക്കുന്നത് മടയത്തമാണ്.
സീരിയലുകള് വീട്ടമ്മമാരിലും മറ്റും ഉണ്ടാക്കുന്ന മാനസിക സംഘര്ഷങ്ങളെക്കുറിച്ച് വിദഗ്ധന്മാരുടെ ലേഖനങ്ങളിലൂടെയും മറ്റും നാം വായിച്ചറിഞ്ഞതാണ്.
സീരിയലുകളില് ദുഷ്ടകഥാപാത്രങ്ങളെ അവതരിപ്പിക്കുന്ന നടീനടന്മാര്ക്ക് പല സ്ഥലത്തുവെച്ചും രോഷാകുലരായ സ്ത്രീപ്രേക്ഷകരില്നിന്ന് തിക്താനുഭവങ്ങള് ഉണ്ടായതും കേട്ടിട്ടുണ്ട്.
സീരിയല് കഥകളും കഥാപാത്രങ്ങളും നല്ലൊരു ഭാഗം പ്രേക്ഷകരില് സ്വാധീനം ചെലുത്തുന്നുണ്ട് എന്നതിന് വേറെ തെളിവുകള് ആവശ്യമില്ല.
വിവാഹേതര ബന്ധങ്ങളും ജാരസന്തതികളും സാര്വത്രികമാണെന്നും അതില് ധാര്മികതയുടെയോ മാന്യതയുടെയോ വിലക്കുകള് പഴഞ്ചനാണെന്നുമുള്ള സന്ദേശം ഇപ്പോള് ഒട്ടുമിക്ക സീരിയലുകളും പ്രേക്ഷകര്ക്ക് നല്കുന്നുണ്ട്.
അതേസമയം, മതസൗഹാര്ദത്തിന്റെയോ ധാര്മിക മൂല്യങ്ങളുടെയോ സ്നേഹബന്ധങ്ങളുടെയോ നല്ല മനുഷ്യരുടെ മാത്രം കഥ പറയുന്നതോ ആയ ഒരു സീരിയല് എങ്കിലും ഉണ്ടോ എന്നത് സംശയമാണ്.
വികലമായ സന്ദേശം നല്കുന്ന സീരിയലുകള് പ്രേക്ഷകരില് അടിച്ചേല്പിക്കുന്നത് ഗുരുതരമായ കുറ്റമാണ്.
ഇങ്ങനെ ചെയ്യുന്നതിലുള്ള കുറ്റബോധംകൊണ്ടാണോ ഭയംകൊണ്ടാണോ എന്നറിയില്ല, ഇപ്പോള് ചില ചാനലുകള് സീരിയലുകളുടെ തുടക്കത്തില് ‘ഡിസ്കൈ്ളമര് ‘ പരസ്യം നല്കി തടി രക്ഷപ്പെടുത്താന് നോക്കുന്നുണ്ട്.
ചാനലുകളിലെ പരിപാടികളെക്കുറിച്ച് പരാതി പറയുന്നവരോട് സ്വാഭാവികമായും അവര് ചോദിക്കും: നിങ്ങള്ക്ക് അവ കാണാതിരുന്നുകൂടേ?
ധാരാളം പേര് സീരിയലുകളോ മറ്റു പരിപാടികളോ അസഹ്യമാകുമ്പോള് ടി.വി സ്വിച്ച് ഓഫ് ചെയ്യുകയും അവ കാണാതിരിക്കുകയും ചെയ്യുന്നുണ്ട്.
അതേസമയം, അത് കാണുന്നവരെല്ലാം ആസ്വദിച്ച് കാണുന്നവരാണെന്നും അവര്ക്കാര്ക്കും അതിനെ ചോദ്യംചെയ്യാന് അവകാശമില്ലെന്നും പറയുന്നത് വിവരക്കേടാണ്.
പലരും സാഹചര്യങ്ങളുടെ പ്രേരണയിലും സാന്ദര്ഭികമായും വിമര്ശ മനോഭാവത്തോടെയും നിരൂപണ ചിന്തയോടെയും സീരിയല് കാണാറുണ്ട്.
അങ്ങനെയുള്ളവര് ഉള്പ്പെടെ എല്ലാ പ്രേക്ഷകരെയും എത്ര ക്രൂരമായി പീഡിപ്പിക്കാനും ചാനലുകള്ക്ക് അവകാശമുണ്ട് എന്ന് ധരിക്കുന്നത് തെറ്റാണ്.
പ്രേക്ഷകരില് കോടതിയെക്കുറിച്ചും നിയമവ്യവസ്ഥയെക്കുറിച്ചും പുച്ഛവും അനാദരവും ജനിപ്പിക്കുന്ന രംഗങ്ങള് സീരിയലുകളില് ചിത്രീകരിച്ചുകാണുന്നുണ്ട്.
കോടതി നടപടികളുടെയോ നിയമങ്ങളുടെയോ ബാലപാഠങ്ങള്പോലും മനസ്സിലാക്കാതെ സാധാരണ പ്രേക്ഷകന്റെ സാമാന്യബുദ്ധിയെപ്പോലും ചോദ്യംചെയ്യുന്ന തരത്തിലുള്ള വാദമുഖങ്ങളും മറ്റും കോടതിയില് അവതരിപ്പിച്ച് നീതിന്യായ വ്യവസ്ഥയെ ആക്ഷേപിക്കുകയാണ് അവര് ചെയ്യുന്നത്.
സീരിയല് എന്നപേരില് ആര്ക്കും എന്തും പടച്ചുവിടാമെന്നും ജനം അത് കാണാന് വിധിക്കപ്പെട്ടവരാണെന്നുമുള്ള പോക്ക് അവസാനിപ്പിക്കണം.
അതിന് പ്രേക്ഷകര്തന്നെ മുന്നിട്ടിറങ്ങണം.
റസിഡന്റ്സ് അസോസിയേഷന് യോഗങ്ങളില് , നിലവാരം കുറഞ്ഞ ടി.വി പരിപാടികളെക്കുറിച്ച് ചര്ച്ചചെയ്യാന് അവസരം കണ്ടെത്തണം.
കലാമൂല്യമില്ലായ്മകൊണ്ടോ അപകടകരമായ സന്ദേശം നല്കുന്നതുകൊണ്ടോ ബഹിഷ്കരിക്കേണ്ടതായ പരിപാടികളെക്കുറിച്ച് തീരുമാനത്തില് എത്തണം.
അത്തരം തീരുമാനങ്ങള് റെസിഡന്റ്സ് അസോസിയേഷന്റെ പരസ്യബോര്ഡുകള് വഴിയോ മറ്റു മാര്ഗങ്ങളിലൂടെയോ പ്രചരിപ്പിക്കണം.
അതിനുമുന്നോടിയായി ഓരോ വീടുകളിലും മോശമായ ടി.വി പരിപാടികളെക്കുറിച്ച് കുടുംബാംഗങ്ങള്ക്കിടയില് ധാരണയുണ്ടാക്കുകയും അത്തരം പരിപാടികള് കാണുകയില്ലായെന്ന് തീരുമാനിക്കുകയും ചെയ്യണം.
സീരിയലുകളെപ്പോലെയോ അതിനേക്കാള് മോശമായ രീതിയിലോ ഉള്ള രംഗങ്ങള് പല സിനിമകളിലും കാണാറുണ്ട്.
അക്രമങ്ങളും അന്ധവിശ്വാസങ്ങളും കുത്തിനിറച്ച ധാരാളം സിനിമകള് സെന്സര് ബോര്ഡ് സര്ട്ടിഫിക്കറ്റ് വാങ്ങി പ്രദര്ശനത്തിനെത്തുന്നുണ്ട്.
നമ്മുടെ യുവതലമുറയെ വഴിതെറ്റിക്കുന്ന അത്തരം സിനികള്ക്കെതിരെ ജാഗ്രത വേണം.
അവ ബഹിഷ്കരിച്ച് പ്രതിഷേധം അറിയിക്കാന് നമുക്ക് എളുപ്പമുണ്ട്.
തരംതാഴ്ന്ന സിനിമകള് നമുക്ക് തിയറ്ററില് പോയി കാണാതിരിക്കാം.
കലക്ഷനില് അത് ഉടന് പ്രതിഫലിക്കും.
അങ്ങനെ നമ്മുടെ പ്രതിഷേധം നിര്മാതാവിനും സംവിധായകനും അനുഭവപ്പെടുകയും ചെയ്യും.
ആ നിര്മാതാവോ സംവിധായകനോ പിന്നെ അത്തരം സിനിമകള് എടുക്കാന് മടിക്കും.
പക്ഷേ, സീരിയലുകളെ അങ്ങനെ നേരിടാന് ആവില്ല.
കാരണം, അവ വീട്ടിലിരിക്കുന്ന പ്രേക്ഷകരില് അല്പാല്പമായി അടിച്ചേല്പിക്കപ്പെടുകയാണ്.