ആം ആദ്മി വിജയത്തിന്െറ പത്ത് കാരണങ്ങള് ന്യൂഡല്ഹി: 2013ല് അധികാരത്തില് വന്ന അരവിന്ദ് കെജ് രിവാള് സര്ക്കാര് 49 ദിവസം കഴിഞ്ഞ് രാജിവെച്ചതോടെ ഒരു ചരിത്രമായി മാറുകയായിരുന്നു. ഇതിനുശേഷം ഒരുപാട് പഴികേട്ട കെജ് രിവാള് സധൈര്യം വീണ്ടും തെരഞ്ഞെടുപ്പിനെ നേരിടുകയായിരുന്നു. തന്െറ സഹപ്രവര്ത്തകരോടൊപ്പം കൃത്യമായ ആസൂത്രണത്തോടെ സമൂഹത്തില് പ്രവര്ത്തിച്ച് എല്ലാവരെയും മോഹിപ്പിക്കുന്ന വിജയമാണ് എ.എ.പി ഇന്ന് നേടിയത്.
അധികാരത്തിലിരുന്ന് 49 ദിവസത്തിനകം തന്നെ കസേര വിട്ടെറിഞ്ഞത് തെറ്റായിപ്പോയെന്ന് കെജ് രിവാള് ജനങ്ങളോട് പറഞ്ഞു. ഈ ഏറ്റുപറച്ചില് പിന്നീട് ജനങ്ങള്ക്കിടയില് സ്വാധീനം ചെലുത്തുന്നതാണ് കണ്ടത്.
ഡല്ഹിയില് എ.എ.പിയുടെയും കെജ് രിവാളിനെയും സഹായിച്ച 10 പ്രധാന ഘടകങ്ങള്:
1) കെജ് രിവാളിന്െറ പ്രതിച്ഛായ, ഏറ്റുപറച്ചില്
അരവിന്ദ് കെജ് രിവാള് എന്ന ഒറ്റയാന്െറ പ്രതിച്ഛായ തന്നെയാണ് എ.എ.പി വിജയത്തിലെ ഏറ്റവും വലിയ ഘടകം. അധികാരത്തില് നിന്ന് ഒഴിഞ്ഞത് തെറ്റായിപ്പോയെന്ന ഏറ്റുപറച്ചില് ജനങ്ങള് സ്വീകരിച്ചു. അവര് കെജ് രിവാളിന് മാപ്പുനല്കി. ഇന്ത്യയിലെ പാരമ്പര്യ രാഷ്ട്രീയ പാര്ട്ടികളുടെ ഭാഗത്തുനിന്നുണ്ടാകാത്ത ഒരു പ്രതികരണമായിരുന്നു കെജ് രിവാള് നടത്തിയത്. കെജ് രിവാളിനെ മുഖ്യമന്ത്രി സ്ഥാനാര്ഥിയായി ഉയര്ത്തിക്കാട്ടിയതും എ.എ.പിയുടെ ഏറ്റവും വലിയ മുതല്ക്കൂട്ടായി.
2) തെരഞ്ഞെടുപ്പ് പ്രഖ്യാപിക്കുന്നതിന്െറ മൂന്നോ നാലോ മാസം മുമ്പ് എ.എ.പി പ്രവര്ത്തനം ആരംഭിച്ചു
2014 ഒക്ടോബറില് തന്നെ പാര്ട്ടി വളണ്ടിയര്മാരും നേതാക്കളും ജനങ്ങള്ക്കിടയിലേക്ക് ഇറങ്ങി. ഡല്ഹിയിലെ ഏകദേശം എല്ലാ വോട്ടര്മാരെയും ഇവര് നേരിട്ട് തന്നെ കണ്ടു. ചെറിയ യോഗങ്ങള്, പദയാത്രകള് തുടങ്ങിയവ വന് റാലികളേക്കാള് ഫലപ്രദമായി. എ.എ.പിയും അവരുടെ നേതാക്കളും പ്രവര്ത്തകരും തങ്ങളുടെ കൂടെയുള്ളവരാണെന്ന തോന്നല് ജനങ്ങളിലുണ്ടാക്കി.
3) സാധാരണപ്രശ്നങ്ങളില് ശ്രദ്ധ കേന്ദ്രീകരിച്ചു
കോണ്ഗ്രസും ബി.ജെ.പിയും ഉയര്ത്തുന്നതില് നിന്ന് വ്യത്യസ്തമായി പ്രാദേശിയ വിഷയങ്ങള് ഉന്നയിച്ച് എ.എ.പി ജനങ്ങള്ക്കിടയിലേക്ക് ഇറങ്ങി. ഡല്ഹിയിലെ പ്രധാന പ്രശ്നങ്ങളായ സ്ത്രീസുരക്ഷ, പൊതുശുചിത്വം, വൈദ്യുതി പ്രശ്നം, കുടിവെള്ളം, സ്കൂളുകളുടെയും കോളജുകളുടെയും അഭാവം തുടങ്ങിയ വിഷയങ്ങള് അവര് ഉയര്ത്തി.
4) ജല, വൈദ്യുതി നിരക്കുകളില് വന് കുറവ് നല്കുമെന്ന വാഗ്ദാനം
ഡല്ഹിയിലടക്കം ജനങ്ങളെ നേരിട്ട് ബാധിക്കുന്ന അഴിമതിക്ക് അന്ത്യം കുറിക്കുമെന്ന പ്രധാന വാഗ്ദാനം ജനങ്ങളെ സ്വാധീനിച്ചു. 49 ദിവസമേ അധികാരത്തില് ഇരുന്നിട്ടുള്ളൂ എങ്കിലും അഴിമതിക്കെതിരെ ക്രിയാത്മകമായി പ്രവര്ത്തിക്കാന് കഴിഞ്ഞു എന്ന് എ.എ.പി അവകാശപ്പെട്ടു.
ജല, വൈദ്യുതി നിരക്കുകള് കുറക്കുമെന്ന വാഗ്ദാനം ചേരികളിലും പാവപ്പെട്ടവരുടെ ഇടയിലും സ്വാധീനമുണ്ടാക്കി.
5) ലോക്സഭാ തെരഞ്ഞെടുപ്പിന് ശേഷം ഡല്ഹിയില് തന്നെ കേന്ദ്രീകരിച്ചു
ലോക്സഭാ തെരഞ്ഞെടുപ്പിന് ശേഷം ഡല്ഹിയില് തന്നെ എ.എ.പിയുടെ പ്രവര്ത്തനം കേന്ദ്രീകരിച്ചു. തെരഞ്ഞെടുപ്പില് ഒറ്റ സീറ്റുപോലും ഡല്ഹിയില് നേടാന് കഴിഞ്ഞി െല്ലങ്കിലും തോറ്റു പിന്മാറാന് പാര്ട്ടി തയാറായില്ല. പ്രാദേശിക വിഷയങ്ങള് ഉയര്ത്താന് കെജ് രിവാള് തന്െറ പ്രവര്ത്തകര്ക്ക് പൂര്ണസ്വാതന്ത്ര്യം നല്കി. അതേസമയം അവരുടെ പ്രവര്ത്തനം സൂക്ഷ്മമായി വിലയിരുത്തുകയും ചെയ്തു.
6) കോണ്ഗ്രസിന്െറ തകര്ച്ച
കോണ്ഗ്രസിന്െറ പരമ്പരാഗത വോട്ടുബാങ്ക് എ.എ.പിയിലേക്ക് മാറിയതാണ് തെരഞ്ഞെടുപ്പില് കണ്ടത്. സംസ്ഥാനത്തെ ദലിതുകള്, മുസ് ലിംകള്, പാവപ്പെട്ടവര് എന്നിവര് എ.എ.പിക്കൊപ്പം നിന്നു. ഇത് പാര്ട്ടിയുടെ വന് വിജയത്തിന് ശക്തി പകര്ന്നു.
7) ബി.ജെ.പിയിലെ ഛിദ്രതയും നിഷേധാത്മകമായ പ്രചരണവും
ബി.ജെ.പിയുടെ ഡല്ഹി ഘടകത്തില് ഐക്യം തീരെയില്ലായിരുന്നു. അവര്ക്ക് ഒരു മുഖ്യമന്ത്രി സ്ഥാനാര്ഥിയെ ഉയര്ത്തിക്കാട്ടാന് കഴിഞ്ഞില്ല. പ്രാഥമിക അംഗത്വം പോലുമില്ലാത്ത കിരണ് ബേദിയെ മുഖ്യമന്ത്രി സ്ഥാനാര്ഥിയാക്കിയതോടെ പാര്ട്ടിയില് വിഭാഗീയത വര്ധിക്കുകയാണുണ്ടായത്. മോദി തരംഗം ഉണ്ടെന്നും അതിന്െറ ബലത്തില് ഡല്ഹിയില് എളുപ്പത്തില് ഭരണം പിടിക്കാമെന്ന് ബി.ജെ.പി അന്ധമായി വിശ്വസിച്ചു.
കെജ് രിവാളിനെ വ്യക്തിപരമായി ലക്ഷ്യം വെച്ചുള്ള പ്രചരണങ്ങളും പരസ്യങ്ങളും. കലഹക്കാരനായ ജാതി എന്നാണ് കെജ് രിവാളിനെ ബി.ജെ.പി വിശേഷിപ്പിച്ചത്. കെജ് രിവാളിനോട് ബി.ജെ.പി ചോദിച്ച ചോദ്യങ്ങള് അവര്ക്ക് തന്നെ തിരിച്ചടിയായി. ഡല്ഹിയിലെ പ്രശ്നങ്ങള് എങ്ങനെ പരിഹരിക്കുമെന്ന ചോദ്യത്തിന് ബി.ജെ.പിക്ക് മറുപടിയില്ലായിരുന്നു.
8) മോദിയിലുള്ള അമിതവിശ്വാസം
മോദി കാര്ഡ് ഡല്ഹിയില് ചെലവായില്ല. മുന്നില് മാത്രം നില്ക്കാന് ആഗ്രഹിക്കുന്ന മോദി സംസാരിച്ച റാലിയില് പങ്കെടുത്തവരുടെ എണ്ണം ശുഷ്കമായിരുന്നു. 120 എം.പി.മാര്, 20 മന്ത്രിമാര്, മറ്റ് സംസ്ഥാനങ്ങളിലെ മുഖ്യമന്ത്രിമാര് എന്നിവരെ തെരഞ്ഞെടുപ്പ് പ്രചാരണത്തില് ഇറക്കി. ബി.ജെ.പി അങ്കലാപ്പിലാണ് എന്ന അന്തരീക്ഷം ഇത് ജനങ്ങള്ക്കിടയില് സൃഷ്ടിച്ചു. ഇത് ദാവീദ് ഗോലിയാത്തിനെ നേരിടുന്നു എന്ന പ്രതീതി ജനങ്ങള്ക്കിടയിലുണ്ടാക്കി.
9) ബി.ജെ.പി കിരണ് ബേദിയെ മുഖ്യമന്ത്രിസ്ഥാനത്തേക്ക് ഉയര്ത്തിക്കാട്ടി
കെജ് രിവാളിന് പകരം ബി.ജെ.പി കണ്ടുപിടിച്ച നേതാവാണ് കിരണ് ബേദി. എന്നാല് ഇത് പാര്ട്ടിയില് കൂടുതല് പൊട്ടിത്തെറിക്ക് വഴിവെക്കുകയായിരുന്നു. കിരണ് ബേദിക്കെതിരെ ഉയര്ന്ന വിമത സ്വരങ്ങളെ ദേശീയ അധ്യക്ഷന് അമിത്ഷാ ഇടപെട്ട് അടിച്ചമര്ത്തി. ആളുകളെ കൂട്ടാന് കഴിയാത്ത പ്രസംഗകയാണ് കിരണ് ബേദി. പാര്ട്ടി പ്രവര്ത്തകരോടുള്ള ബേദിയുടെ സമീപനം ധാര്ഷ്ട്യത്തോടെയായിരുന്നു. ബേദിയുടെ വരവോടുകൂടി പ്രാദേശിക നേതാക്കള് പ്രചാരണ രംഗത്തുനിന്നും മാറ്റിനിര്ത്തപ്പെട്ടു.
10) ബി.ജെ.പി നേതാക്കളെ കെജ് രിവാള് പരസ്യമായി വെല്ലുവിളിച്ചു
കെജ് രിവാളിനെ എതിരാളികള് പലതും പറഞ്ഞ് പരിഹസിച്ചു. എന്നാല് അദ്ദേഹം മാളത്തിലൊളിച്ചില്ല. പരസ്യമായ സംവാദത്തിന് ബേദിയെ അദ്ദേഹം വെല്ലുവിളിച്ചു. എന്നാല് വെല്ലുവിളിക്ക് ബേദി ഒരു പ്രതികരണവും നല്കിയില്ല. ഡല്ഹി തെരഞ്ഞെടുപ്പില് ബി.ജെ.പിക്ക് ഒരു പ്രത്യേക പദ്ധതിയില്ല എന്ന പ്രതീതി ഇതുണ്ടാക്കി.