രുചിനിറയും വിഷുക്കാല വിഭവങ്ങള് വിളവെടുപ്പിന്റെ ഉത്സവമാണ് വിഷു. ചക്കയുടേയും മാങ്ങയുടേയും സമൃദ്ധി നിറയുന്ന വിഷുക്കാലം ആഘോഷമാക്കാന് ഇത്തവണ നാടന് വിഭവങ്ങള് ഒരുക്കാം.
1. ചക്ക അടആവശ്യമുള്ള സാധനങ്ങള്
അരിപ്പൊടി- അരക്കിലോ
ചക്ക വരട്ടിയത്-ആവശ്യത്തിന്
ഉപ്പ്- ഒരു നുള്ള്
ഏലയ്ക്ക- നാലെണ്ണം
തേങ്ങാക്കൊത്ത്- രണ്ട് ടേബിള് സ്പൂണ്
വെള്ളം- ആവശ്യത്തിന്
തയാറാക്കുന്ന വിധം
അരിപ്പൊടിയില് ഉപ്പും ചക്കവരട്ടിയതും ചേര്ത്തിളക്കി അട പരത്തുന്ന പരുവത്തില് കുഴയ്ക്കുക. ഇതിലേക്ക് ഏലയ്ക്കയും തേങ്ങാക്കൊത്തും ചേര്ക്കണം. ആവശ്യമെങ്കില് വെള്ളവും ചേര്ത്ത് ഒന്നുകൂടി കുഴയ്ക്കാം. വാഴയില കഷണമാക്കി അതില് പാകത്തിനുള്ള മാവ് വച്ച് ഇത് കൈ കൊണ്ട് പരത്തണം. ശേഷം നെടുവെ മടക്കി ആവി കയറ്റി വേവിച്ചെടുക്കാം.
2. ചക്ക വരട്ടിയത്ആവശ്യമുള്ള സാധനങ്ങള്
പഴുത്ത വരിക്കച്ചക്ക കുരു കളഞ്ഞ് അരച്ചെടുത്തത്- ഏഴ് കപ്പ്
ഉരുക്കിയ ശര്ക്കര-ഒരു കിലോ
നെയ്യ്- ഒരു ടേബിള് സ്പൂണ്
ഏലയ്ക്കാപ്പൊടി- ഒരു ടീസ്പൂണ്
തയാറാക്കുന്ന വിധം
ഉരുളിയില് നെയ്യൊഴിച്ച് ഉരുക്കിയ ശര്ക്കര ചേര്ക്കുക. ചക്ക അരച്ചത് ചേര്ത്ത് ഇളക്കുക. ചെറിയ ചൂടില് ഇളക്കി വരട്ടിയെടുക്കുക. വെള്ളം വറ്റി മിശ്രിതം ഉരുളിയില്നിന്ന് വിട്ടുവരുന്ന പരുവമാകുമ്പോള് ഏലയ്ക്ക പൊടിയും ചേര്ത്ത് യോജിപ്പിച്ച് വാങ്ങാം. പാത്രത്തിലേക്ക് മാറ്റി ആവശ്യാനുസരണം ഉപയോഗിക്കാം.
3. വിഷുക്കട്ടആവശ്യമുള്ള സാധനങ്ങള്
പച്ചരി- അരക്കിലോ
തേങ്ങ ചിരകിയത്-രണ്ടെണ്ണം
ജീരകം -ഒരു ടീസ്പൂണ്
ഉപ്പ്-പാകത്തിന്
അണ്ടിപ്പരിപ്പ്, ഉണക്കമുന്തിരി - പാകത്തിന് നെയ്യ്- രണ്ട് ടീസ്പൂണ് തയാറാക്കുന്ന വിധം തേങ്ങ പിഴിഞ്ഞ് ഒരു കപ്പ് ഒന്നാം പാലും രണ്ടു കപ്പ് രണ്ടാം പാലും എടുക്കുക. രണ്ടാം പാലും ഉപ്പും ചേര്ത്ത് പച്ചരി വേവിക്കുക. വെന്തുകഴിയുമ്പോള് ജീരകവും ഒന്നാം പാലും ചേര്ത്ത് വെള്ളം വറ്റിച്ചെടുക്കാം. ഒരു പാത്രത്തിലേക്ക് മാറ്റി ചതുരക്കട്ടകളായി മുറിക്കുക. അണ്ടിപ്പരിപ്പും ഉണക്കമുന്തിരിയും നെയ്യില് വറുത്ത് വിതറുക.
4. മാമ്പഴ കാളന്
ആവശ്യമുള്ള സാധനങ്ങള്
പഴുത്ത് കാമ്പുള്ള മാമ്പഴം -മൂന്നെണ്ണം (തൊലി കളഞ്ഞ് വലിയ കഷണങ്ങളാക്കി മുറിച്ചത്)
പച്ചമുളക് നീളത്തില് അരിഞ്ഞത്- മൂന്നെണ്ണം
ഇഞ്ചി ചെറുതായരിഞ്ഞത്-ഒരു ടേബിള് സ്പൂണ്
മുളകുപൊടി-ഒരു ടീസ്പൂണ്
ഉപ്പ്- പാകത്തിന്
തേങ്ങ ചിരകിയത്- ഒരു കപ്പ്
മഞ്ഞള്പ്പൊടി- അര ടീസ്പൂണ്
ജീരകം- അര ടീസ്പൂണ്
പുളിയുള്ള തൈര്-രണ്ട് കപ്പ്
വെളിച്ചെണ്ണ- രണ്ട് ടേബിള് സ്പൂണ്
കടുക്- അര ടീസ്പൂണ്
ഉലുവ- അര ടീസ്പൂണ്
വറ്റല്മുളക്- മൂന്നെണ്ണം(കഷണങ്ങളാക്കിയത്)
കറിവേപ്പില- നാല് തണ്ട്
തയാറാക്കുന്ന വിധം
മാങ്ങാ കഷണങ്ങളും മുക്കാല്ക്കപ്പ് വെള്ളവും പച്ചമുളക്, ഇഞ്ചി, മുളകുപൊടി, ഉപ്പ് ഇവയും ചേര്ത്ത് വേവിക്കുക. മഞ്ഞള്പ്പൊടിയും ജീരകവും തേങ്ങയില് ചേര്ത്ത് അരച്ചെടുക്കുക. വേവിച്ച മാങ്ങാ കഷണങ്ങളിലേക്ക് ഉടച്ച തൈരും തേങ്ങാകൂട്ടും ചേര്ത്ത് തിളയ്ക്കുമ്പോള് കറിവേപ്പില ചേര്ത്ത് വാങ്ങാം. വെളിച്ചെണ്ണയില് കടുക്, ഉലുവ, വറ്റല്മുളക്, കറിവേപ്പില മൂപ്പിച്ച് കറിക്ക് മുകളില് പകരാം.
5. ചക്ക തോരന്ആവശ്യമുള്ള സാധനങ്ങള്
അധികം മൂക്കാത്ത ചക്ക-ഒരു കിലോ
മുളകുപൊടി- രണ്ടു ടീസ്പൂണ്
മഞ്ഞള്പ്പൊടി- ഒരു ടീസ്പൂണ്
ജീരകം- ഒരു ടീസ്പൂണ്
കടുക്- ഒരു ടീസ്പൂണ്
ഉപ്പ്- പാകത്തിന്
തേങ്ങ ചിരകിയത്- ഒരെണ്ണം
വെളിച്ചെണ്ണ - ഒരു ടേബിള്സ്പൂണ്
തയാറാക്കുന്ന വിധം
മുളകുപൊടി, മഞ്ഞള്പ്പൊടി, പാകത്തിന് വെള്ളം, ഉപ്പ് ഇവ ചേര്ത്ത് ചക്ക വേവിക്കുക. തേങ്ങ ചിരകിയതില് ജീരകം ചേര്ത്ത് തരുതരിപ്പായി അരച്ച് ഇതില് ചേര്ത്ത് തിളപ്പിക്കുക. കടുക് പൊട്ടിച്ച് വറ്റല്മുളകും കറിവേപ്പിലയും വഴറ്റി കറിക്ക് മുകളില് പകര്ന്ന് വിളമ്പാം.
6. വിഷു പായസംആവശ്യമുള്ള സാധനങ്ങള്
അരിപ്പൊടി വറുത്തത്- ഒരു കപ്പ്
കദളിപ്പഴം അരിഞ്ഞത്- ഒരു കപ്പ്
ശര്ക്കര- അരക്കിലോ
നെയ്യ്-കാല്ക്കപ്പ്
തേങ്ങ ചിരകിയത്-മൂന്നെണ്ണം(മൂന്ന് കപ്പ് ഒന്നാം പാലും ആറ് കപ്പ് രണ്ടാം പാലും തയ്യാറാക്കുക)
ഏലയ്ക്ക പൊടി -ഒരു ടീസ്പൂണ്
ചുക്കു പൊടി-ഒരു ടീസ്പൂണ്
ജീരകപ്പൊടി-ഒരു ടീസ്പൂണ്
തേങ്ങാക്കൊത്ത്- ഒരു ടേബിള്സ്പൂണ്
അണ്ടിപ്പരിപ്പ്- പത്തെണ്ണം
തയാറാക്കുന്ന വിധം
ഉരുളിയില് ശര്ക്കര ഉരുക്കിയത് അരിച്ചൊഴിച്ച് അരിപ്പൊടിയും പഴം അരിഞ്ഞതും നെയ്യും ഒഴിച്ച് ഇവയെല്ലാം യോജിക്കുന്നതുവരെ ഇളക്കുക. ശേഷം രണ്ടാം പാല് ചേര്ക്കുക. തിളച്ച് കുറുകി കഴിയുമ്പോള് ഒന്നാം പാല് ചേര്ക്കാം. ഏലയ്ക്ക, ചുക്ക് , ജീരകപ്പൊടിയും ചേര്ത്തിളക്കി. തിളവരുന്നതിന് മുന്പ് ഇറക്കി വയ്ക്കാം. നെയ്യില് തേങ്ങാക്കൊത്തും അണ്ടിപ്പരിപ്പും മൂപ്പിച്ച് ചേര്ക്കാം.
7.ചക്ക നേന്ത്രപ്പഴം കുമ്പിളട
ആവശ്യമുള്ള സാധനങ്ങള്
പഴുത്ത ചക്കച്ചുള അരിഞ്ഞത് - രണ്ട് കപ്പ്
നേന്ത്രപ്പഴം ചെറുതായി അരിഞ്ഞത് - ഒരു കപ്പ്
തേങ്ങ ചിരകിയത് - ഒന്നരക്കപ്പ്
ഏലയ്ക്കാപ്പൊടി - ഒരു ടീസ്പൂണ്
ജീരകം- അര ടീസ്പൂണ്
ശര്ക്കര- 250 ഗ്രം
അരിപ്പൊടി വറുത്തത് - രണ്ടരക്കപ്പ്
ഉപ്പ്- പാകത്തിന്
നെയ്യ്- ആവശ്യത്തിന്
തയാറാക്കുന്ന വിധം
നെയ്യില് ചക്കച്ചുളയും പഴവും വഴറ്റണം. ഇതിലേക്ക് തേങ്ങ ചിരകിയതും ജീരകം ഏലയ്ക്ക ഇവ പൊടിച്ചതും ചേര്ത്തിളക്കി അടുപ്പില്നിന്ന് ഇറക്കി വയ്ക്കുക. ശര്ക്കര ചീകിയത് ഈ കൂട്ടിലേക്ക് ചേര്ത്തിളക്കുക.
ഇതിലേക്ക് അരിപ്പൊടിയും പാകത്തിന് വെള്ളവും ഉപ്പും ചേര്ത്ത് കുഴയ്ക്കുക. ഇത് അരമണിക്കൂര് വച്ച ശേഷം വഴനയിലയോ വാഴയിലയോ കുമ്പിളുകളാക്കി അതില് മാവ് നിറച്ച് അപ്പച്ചെമ്പില് വച്ച് ആവി കയറ്റുക. വെന്തുകഴിയുമ്പോള് അടുപ്പത്തുനിന്നും മാറ്റി വിളമ്പാം.
8. വിഷു കഞ്ഞി
ആവശ്യമുള്ള സാധനങ്ങള്
ചുവന്ന അരി- മൂന്ന് കപ്പ്
പച്ചരി- ഒരു കപ്പ്
പുളി അവരയ്ക്ക വറുത്തുപൊടിച്ചത് - ഒരു കപ്പ്
തേങ്ങ- ഒരെണ്ണം(ചിരകിയത്)
വെള്ളം- 6 കപ്പ്
ഉപ്പ്- പാകത്തിന്
തയാറാക്കുന്ന വിധം
ചുവന്ന അരി, പച്ചരി, പുളി അവരയ്ക്ക എന്നിവ പാകത്തിന് ഉപ്പ് ചേര്ത്ത് കഞ്ഞിയുടെ പാകം വരെ വേവിക്കുക. വാങ്ങാറാകുമ്പോള് തേങ്ങ ഇടുക. അഞ്ച് മിനിറ്റ് തിളച്ച ശേഷം വാങ്ങാം. ആവശ്യമെങ്കില് അല്പ്പം ശര്ക്കര ചേര്ക്കാം.