നാടന്‍ വിഭവങ്ങളുടെ രുചി ! അതൊന്നു വേറെ!
വീട്ടില്‍ ഉണ്ടാക്കുന്ന ഭക്ഷണത്തിന്റെ രുചി, അതൊന്നു വേറെ തന്നെ. പ്രത്യേകിച്ച്‌ നാടന്‍ ഭക്ഷണങ്ങളാണെങ്കിലോ? പറയുകയും വേണ്ട. ഇതാ വീട്ടില്‍ പരീക്ഷിക്കാവുന്ന ചില നാടന്‍ രുചികള്‍.
കോഴി ചുട്ടത്‌
ആവശ്യമുള്ള സാധനങ്ങള്‍
കോഴി വൃത്തിയാക്കിയത്‌ - ഒരെണ്ണം മുഴുവനും
അരപ്പിന്‌
മുളകുപൊടി - ഒരു ടേബിള്‍ സ്‌പൂണ്‍
മല്ലിപ്പൊടി - രണ്ട്‌ ടേബിള്‍ സ്‌പൂണ്‍
കുരുമുളകുപൊടി - ഒരു ടീസ്‌പൂണ്‍
തൈര്‌ - കാല്‍കപ്പ്‌
ജാതിക്കാ പൊടിച്ചത്‌ - ഒരു ടീസ്‌പൂണ്‍
മഞ്ഞള്‍പ്പൊടി - ഒരു ടീസ്‌പൂണ്‍
ഇഞ്ചി, വെളുത്തുള്ളി അരച്ചത്‌ - ഒരു ടീസ്‌പൂണ്‍
ഗരംമസാല - ഒരു ടീസ്‌പൂണ്‍
തയാറാക്കുന്നവിധം
ചേരുവകളെല്ലാം ഒരുമിച്ച്‌ കുഴച്ച്‌ അരപ്പ്‌ തയാറാക്കുക. കോഴിയില്‍ ഫോര്‍ക്കുവച്ച്‌ നന്നായി കുത്തുക. അരപ്പ്‌ കോഴിയില്‍ പുരട്ടി നാലുമണിക്കൂര്‍ (ഫ്രിഡ്‌ജില്‍) വയ്‌ക്കുക. ശേഷം വാട്ടിയ വാഴയിലയില്‍ കോഴി പൊതിയുക. ഇതുപോലെ വാഴയിലയില്‍ രണ്ടുമൂന്നു പ്രാവശ്യം പൊതിഞ്ഞശേഷം തീക്കനല്‍വച്ച്‌ മൂടി ചുട്ടെടുക്കുക. (വാഴയിലയുടെ ഞരമ്പ്‌ മാറ്റിവേണം ഉപയോഗിക്കാന്‍).
കൂവപ്പൊടി കാച്ചിയത്‌
ആവശ്യമുള്ള സാധനങ്ങള്‍
കൂവപ്പൊടി - ഒരു ടേബിള്‍ സ്‌പൂണ്‍
വെള്ളം - രണ്ട്‌ കപ്പ്‌
ഉപ്പ് - ഒരു നുള്ള്‌
പഞ്ചസാര - പാകത്തിന്‌
ഏലക്കായ്‌ - ഒന്ന് (ചതച്ചത്‌)
പാല്‍ - അരഗ്ലാസ്‌
അണ്ടിപ്പരിപ്പ്‌ - രണ്ട്‌ സ്‌പൂണ്‍ (പൊടിച്ചത്‌)
തയാറാക്കുന്നവിധം
കുറച്ച്‌ വെള്ളത്തില്‍ കൂവപ്പൊടി കലക്കിവയ്‌ക്കുക. ഒരു പാത്രത്തില്‍ വെള്ളം എടുത്ത്‌ അടുപ്പില്‍ വച്ച് അതിലേക്ക്‌ കലക്കിവച്ച പൊടി കലക്കിയതു ചേര്‍ത്ത്‌ കട്ടകെട്ടാതെ ഇളക്കുക. പഞ്ചസാര, ഏലക്കായ്‌, പാല്‍, അണ്ടിപ്പരിപ്പ്‌ എന്നിവ ചേര്‍ത്തിളക്കി തിളച്ചതിനുശേഷം വാങ്ങുക. ഇത് മൂത്രക്കടച്ചിലിനും ക്ഷീണത്തിനും വളരെ നല്ലതാണ്‌.
ഇഞ്ചിച്ചായ
ആവശ്യമുള്ള സാധനങ്ങള്‍
ഇഞ്ചി ചതച്ചത്‌ - ഒരു കഷണം
പഞ്ചസാര - ഒരു ടീസ്‌പൂണ്‍
തേയില - രണ്ട്‌ ടീസ്‌പൂണ്‍
പാല്‍ - ഒരു കപ്പ്‌
വെള്ളം - നാല്‌ കപ്പ്‌
തയാറാക്കുന്ന വിധം
ഇഞ്ചിചതച്ച വെള്ളം തിളച്ചശേഷം ചെറുതീയില്‍ പത്തുമിനിറ്റ്‌ പാത്രം അടച്ചുവയ്‌ക്കണം. പിന്നീട്‌ തേയിലയും പഞ്ചസാരയും ചേര്‍ത്ത്‌ വാങ്ങണം. ചൂടുള്ള പാലൊഴിച്ച്‌ അരിച്ചെടുത്ത്‌ ഉപയോഗിക്കാം.
ജീരകച്ചായ
ആവശ്യമുള്ള സാധനങ്ങള്‍
ജീരകം- അരടീസ്‌പൂണ്‍
ഇഞ്ചി - ഒരു കഷണം
തേയില - ഒര ടീസ്‌പൂണ്‍
വെള്ളം - രണ്ട്‌ കപ്പ്‌
തയാറാക്കുന്ന വിധം
ജീരകം, ഇഞ്ചി എന്നിവ ചേര്‍ത്ത്‌ വെള്ളം തിളപ്പിച്ചശേഷം തേയില ചേര്‍ക്കുക. അരിച്ചെടുത്ത്‌ ചൂടോടെ കപ്പിലൊഴിച്ച്‌ വിളമ്പാം.
കരിമീന്‍ ചുട്ടത്‌
ആവശ്യമുള്ള സാധനങ്ങള്‍
കരിമീന്‍ (ചെത്തി വൃത്തിയാക്കിയത്‌) - 500 ഗ്രാം
വെളുത്തുള്ളി - മൂന്ന്‌ അല്ലി
ഇഞ്ചി - ഒരു കഷണം
കുരുമുളകുപൊടി
- രണ്ട്‌ ടീസ്‌പൂണ്‍
ഫിഷ്‌ മസാല - ഒരു ടീസ്‌പൂണ്‍
കറിവേപ്പില - ഒരു തണ്ട്‌
അണ്ടിപ്പരിപ്പ്‌ - പത്തെണ്ണം (അരയ്‌ക്കുക)
തയാറാക്കുന്ന വിധം
മീനൊഴിച്ച്‌ ബാക്കി ചേരുവകളെല്ലാം ഒരുമിച്ച്‌ ചേര്‍ത്ത്‌ അരപ്പ്‌ തയ്യാറാക്കുക. മീനില്‍ പുരട്ടി അരമണിക്കൂര്‍ വയ്‌ക്കുക. വാഴയിലയില്‍ ഓരോ മീനായിട്ടെടുത്ത്‌ ഇലയില്‍ പൊതിഞ്ഞ്‌ ദോശക്കല്ലില്‍വച്ച്‌ കരിഞ്ഞുപോകാതെ തിരിച്ചും മറിച്ചുമിട്ട്‌ ചുട്ടെടുക്കുക.
പനഞ്ഞീലപ്പം
ആവശ്യമുള്ള സാധനങ്ങള്‍
മീന്‍ പനഞ്ഞീല്‍ - കാല്‍കപ്പ്‌
തേങ്ങ ചിരവിയത്‌ - അരക്കപ്പ്‌
മുളകുപൊടി - അരടീസ്‌പൂണ്‍
പച്ചമുളക്‌ - മൂന്നെണ്ണം (അരിയുക)
സവാള - ഒരെണ്ണം (ചെറുതായി അരിയുക)
മഞ്ഞള്‍പ്പൊടി - ഒരു നുള്ള്‌
ഉപ്പ് - പാകത്തിന്‌
കറിവേപ്പില - ഒരു തണ്ട്‌
ഇഞ്ചി - ഒരു ചെറിയ കഷണം
തയാറാക്കുന്ന വിധം
എല്ലാ ചേരുവകളും ചെറുതായി അരിഞ്ഞ്‌ പനഞ്ഞീലില്‍ ചേര്‍ത്ത്‌ നന്നായി ഉടച്ചിളക്കുക. ഇത് ചെറിയ ഉരുളകളാക്കി ഉരുട്ടി ചീനച്ചട്ടിയില്‍ ചെറിയ ചൂടില്‍ തിരിച്ചും മറിച്ചുമിട്ട്‌ എണ്ണയില്‍ വറുത്തെടുക്കുക.
മുളന്തണ്ടില്‍ വേവിച്ച ചോറ്‌
ആവശ്യമുള്ള സാധനങ്ങള്‍
അരി - 200 ഗ്രാം
പച്ചമുളക്‌ - 30 സെ.മീ. നീളത്തില്‍
വെള്ളം - ഒരു കപ്പ്‌
ഉപ്പ് - ആവശ്യത്തിന്‌
പട്ട - രണ്ട്‌ ചെറിയ കഷണം
ഗ്രാമ്പൂ - മൂന്നെണ്ണം
ഏലയ്‌ക്ക - രണ്ടെണ്ണം
തയാറാക്കുന്ന വിധം
മുളയുടെ ഒരു വശം തുരന്ന്‌ അതില്‍ അരി, വെള്ളം, ഉപ്പ്, പട്ട, ഗ്രാമ്പൂ, ഏലയ്‌ക്ക എന്നിവ ചേര്‍ത്ത്‌ ചുട്ടെടുക്കുക. 20 മിനിട്ടിനുശേഷം വിളമ്പാം.
വട്ടയിലയപ്പം
ആവശ്യമുള്ള സാധനങ്ങള്‍
ഗോതമ്പുമാവ്‌ - മൂന്ന്‌ കപ്പ്‌
ശര്‍ക്കരപ്പാനി അരിച്ചത്‌ - രണ്ട്‌ കപ്പ്‌
അവല്‍ - ഒരു കപ്പ്‌
തേങ്ങ - ഒരു കപ്പ്‌
ഏലയ്‌ക്ക - അഞ്ചെണ്ണം
ഉപ്പ് - പാകത്തിന്‌
വെള്ളം - ആവശ്യത്തിന്‌
തയാറാക്കുന്ന വിധം
ഉപ്പുചേര്‍ത്ത്‌ വെള്ളം ചൂടാക്കി ഗോതമ്പുമാവ്‌ ചേര്‍ത്ത്‌ കുഴച്ചെടുക്കുക. ശര്‍ക്കര പാനിയാക്കി അരിച്ചെടുത്തതില്‍ തേങ്ങ, അവല്‍, ഏലയ്‌ക്കാപ്പൊടി എന്നിവ വഴറ്റിയെടുക്കുക. വട്ടയിലയില്‍ വെള്ളം തടവി കുഴച്ച മാവ്‌ ഉരുളയായിയെടുത്ത്‌ വയ്‌ക്കുക. ഇതിനുള്ളില്‍ ശര്‍ക്കരക്കൂട്ട്‌ വച്ച് നാരുകൊണ്ട്‌ കെട്ടി ചെറുതീയില്‍ ചുട്ടെടുക്കുക. അല്ലെങ്കില്‍ അപ്പച്ചെമ്പില്‍ ആവികയറ്റുക.
കപ്പ ചുട്ടത്‌
ആവശ്യമുള്ള സാധനങ്ങള്‍
പച്ചക്കപ്പ - നാലെണ്ണം
തയാറാക്കുന്ന വിധം
തൊലിയോടെ കനലില്‍ ചുട്ടെടുത്ത്‌ ചൂടോടെ തൊലി നീക്കി ഉണക്കമീന്‍ ചമ്മന്തിക്കൊപ്പം വിളമ്പാം.
ഓട്ടട
ആവശ്യമുള്ള സാധനങ്ങള്‍
ഗോതമ്പുപൊടി - രണ്ട്‌ കപ്പ്‌
ശര്‍ക്കര ചീകിയത്‌ - അരക്കപ്പ്‌
തേങ്ങ ചിരണ്ടിയത്‌ - ഒരു കപ്പ്‌
ഏലയ്‌ക്ക ചതച്ചത്‌ - രണ്ടെണ്ണം
ഉപ്പ് - ഒരു നുള്ള്‌
തയാറാക്കുന്ന വിധം
ഗോതമ്പുപൊടി ഉപ്പിട്ട്‌ ചപ്പാത്തിമാവിനേക്കാള്‍ അല്‍പ്പം അയവില്‍ കുഴയ്‌ക്കുക. തേങ്ങ, ശര്‍ക്കര, ഏലയ്‌ക്ക എന്നിവ നന്നായി തിരുമ്മി കുഴയ്‌ക്കുക. ഇലയില്‍ വെള്ളം തൊട്ട്‌ മാവ്‌ പരത്തി മീതെ ശര്‍ക്കരക്കൂട്ട്‌ നിരത്തി ഇല മടക്കി ദോശക്കല്ലില്‍ കുറഞ്ഞ തീയില്‍ ചുട്ടെടുക്കുക.
പഞ്ഞപ്പുല്‍ അപ്പം
ആവശ്യമുള്ള സാധനങ്ങള്‍
പഞ്ഞപ്പുല്‍പ്പൊടി - ഒരു കപ്പ്‌
അരിപ്പൊടി - അരക്കപ്പ്‌
യീസ്‌റ്റ് - അരടീസ്‌പൂണ്‍
പഞ്ചസാര - രണ്ട്‌ ടീസ്‌പൂണ്‍
ചൂടുവെള്ളം - അരക്കപ്പ്‌
തേങ്ങാവെള്ളം - ഒരു കപ്പ്‌
കുറുക്കാനുള്ള തരി - കാല്‍കപ്പ്‌
തേങ്ങാപ്പാല്‍ - രണ്ട്‌ കപ്പ്‌
പഞ്ചസാര - ഒരു ടീസ്‌പൂണ്‍
ഉപ്പ് - പാകത്തിന്‌
തയാറാക്കുന്ന വിധം
യീസ്‌റ്റും പഞ്ചസാരയും ചെറു ചൂടുപാല്‍ ഒഴിച്ച് പൊങ്ങാന്‍ വയ്‌ക്കുക. പൊങ്ങി വരുമ്പോള്‍ പഞ്ഞപ്പുല്ലും അരിപ്പൊടിയും തേങ്ങാവെള്ളവും ചേര്‍ത്ത്‌ കട്ടകെട്ടാതെ കലക്കിവയ്‌ക്കുക. ചൂടുവെള്ളം ഒഴിച്ച് തരി കലക്കി തണുത്തുകഴിയുമ്പോള്‍ പൊടിയില്‍ ചേര്‍ത്ത്‌ കുഴയ്‌ക്കുക. പാകത്തിന്‌ തേങ്ങാപ്പാല്‍ ഒഴിച്ച് കലക്കിവയ്‌ക്കുക. നാലുമണിക്കൂര്‍ പുളിച്ചശേഷം പഞ്ചസാര, ഉപ്പ് ഇവ ചേര്‍ത്ത്‌ അപ്പച്ചട്ടിയില്‍ പാലപ്പംപോലെ ഉണ്ടാക്കിയെടുക്കുക.
Home 
Publications 
Calendar
ethu
Ammu
.......നീല് നാളെ വരും ....ഓൾ പരീക്ഷിച്ചിട്ട് നമുക്ക് ഉണ്ടാക്കാമെ ....
മോശം ആവാൻ വഴിയില്ല, എന്തൊരു മണമാണ് ആ ഇലക്ക് 
(ഞാന്‍ ഉണ്ടാക്കിയത് അല്ലെ പിന്നെ ആര് കഴിക്കാന്‍... 
)
