FILM News, Discussion

ടിനിയുടെ മനസ്സുരുകി, മേജര്‍ രവിയുടെ പടം പൊട്ടി!
ടിനി ടോം മലയാള സിനിമയില്‍ ചുവടുറപ്പിച്ചുകഴിഞ്ഞു. പ്രാഞ്ചിയേട്ടന്‍റെ വിജയം ടിനി എന്ന നടനെ കുറച്ചൊന്നുമല്ല സഹായിച്ചത്. ചിത്രീകരണം നടക്കുന്ന മിക്ക സിനിമകളിലും ടിനിയുടെ സാന്നിധ്യമുണ്ട്. സുരാജ് വെഞ്ഞാറമ്മൂടിനെപ്പോലെ ടിനിയും പ്രേക്ഷകരുടെ ഹരമായി മാറുകയാണ്.

സിനിമയില്‍ മുഖം കാണിക്കാനായി ഏറെ ബുദ്ധിമുട്ടിയ നടനാണ് ടിനി ടോം. മിമിക്രിയിലൂടെ വരുകയും പിന്നീട് ചാനല്‍ പ്രോഗ്രാമുകളുടെ ഭാഗമാകുകയും ചെയ്തു. അതിനുശേഷം ഏറെക്കാലം സിനിമയില്‍ മമ്മൂട്ടിയുടെ ഡ്യൂപ്പായി അഭിനയിച്ചു. പട്ടണത്തില്‍ ഭൂതം, അണ്ണന്‍ തമ്പി, പാലേരിമാണിക്യം തുടങ്ങിയ സിനിമകളില്‍ ടിനി ടോം മമ്മൂട്ടിയുടെ ഡ്യൂപ്പായിരുന്നു. പിന്നീട് മമ്മൂട്ടിയുടെ സഹായത്തോടെ തന്നെയാണ് ടിനി സിനിമാനടനായി മാറുന്നത്. പട്ടാളം എന്ന സിനിമയിലെ വേഷം ശ്രദ്ധിക്കപ്പെട്ടു. പിന്നീടിപ്പോള്‍ പ്രാഞ്ചിയേട്ടന്‍ ആന്‍റ് ദി സെയിന്‍റ്.

പ്രേക്ഷകരെ ചിരിപ്പിക്കാന്‍ ആഗ്രഹിക്കുന്ന തന്നെ ഏറെ കരയിച്ച ഒരനുഭവം ടിനി പറയുന്നു, ഒരു ആഴ്ചപ്പതിപ്പിന് അനുവദിച്ച അഭിമുഖത്തില്‍. “സിനിമയില്‍ അവസരം തേടി പല സംവിധായകരെയും ഞാന്‍ സമീപിക്കുന്ന സമയം. അപ്പോഴാണ് പട്ടാള സിനിമകള്‍ മാത്രമെടുക്കുന്ന ഒരു സംവിധായകന്‍ എറണാകുളം റസ്റ്റ് ഹൌസില്‍ ഉണ്ടെന്നറിഞ്ഞത്. ഞാന്‍ ചെന്നു. എന്നെ കണ്ടിട്ടും അദ്ദേഹം ഒന്നും മിണ്ടിയില്ല. ഇരിക്കാന്‍ പോലും പറഞ്ഞില്ല. അദ്ദേഹം പട്ടാളം സിനിമയുടെ സെറ്റില്‍ വന്ന് എനിക്ക് പരിശീലനമൊക്കെ തന്നിട്ടുള്ള വ്യക്തിയാണ്. ആ പരിചയം പോലും ഭാവിച്ചില്ല. ഞാന്‍ കാര്യം അവതരിപ്പിച്ചു. അയാള്‍ മുഖമുയര്‍ത്തി എന്നെയൊന്നു നോക്കിയിട്ടു പറഞ്ഞു - ‘ഓ...നിങ്ങളുടെയൊക്കെ സഹായം വേണം. സിനിമയിറങ്ങട്ടെ.... പോസ്റ്റര്‍ ഒട്ടിക്കാന്‍ ആളെ വേണ്ടിവരും. അപ്പോള്‍ വിളിക്കാം’. ഞാന്‍ ആകെ ഉരുകിപ്പോയി. പക്ഷേ, ആ പടം ഇറങ്ങിയപ്പോള്‍ എട്ടുനിലയില്‍ പൊട്ടി മൂക്കുംകുത്തി വീണു. അതില്‍ അഭിനയിക്കാന്‍ സാധിക്കാതിരുന്നത് ഭാഗ്യമായെന്ന് ഞാന്‍ ഇപ്പോള്‍ കരുതുന്നു.” - ടിനി വിശദീകരിച്ചു.

ടിനി പറയുന്ന ആ സംവിധായകന്‍ മേജര്‍ രവി ആണെന്നതില്‍ സംശയമില്ല. ബോക്സോഫീസില്‍ തകര്‍ന്ന ആ ചിത്രം ‘മിഷന്‍ 90 ഡെയ്സ്’ ആയിരിക്കണം. ഇപ്പോഴിതാ, മേജര്‍ രവിയുടെ കാണ്ഡഹാറും പൊട്ടിത്തകര്‍ന്നിരിക്കുന്നു. ടിനിയെപ്പോലുള്ളവരുടെ ശാപമായിരിക്കുമോ കാണ്ഡഹാറിന്‍റെയും വിധി നിര്‍ണയിച്ചത്?

ആമിര്‍ഖാനും സല്‍മാന്‍ഖാനും ബിടൌണില്‍ എതിരാളികളാണെങ്കിലും ഒരു സഹായം വേണ്ടി വന്നാല്‍ ചോദിക്കാനോ നല്‍കാനോ മടി കാണിക്കാത്തവരാണെന്ന് ആര്‍ക്കാണറിയാത്തത് ? ആമിര്‍ ഖാനാണെങ്കില്‍ അറിയപ്പെടുന്നതു തന്നെ 'മിസ്റ്റര്‍ പെര്‍ഫക്ഷനിസ്റ്റ് എന്നാണ്. കഥാപാത്രത്തിന്റെ മികവിനു വേണ്ടി എത്ര കഷ്ടപ്പെടാനും തയാറുള്ള താരം.

ഇനിയൊരു ചിത്രകാരന്റെ വേഷത്തില്‍ അഭിനയിച്ചു കളയാമെന്നു തീരുമാനിച്ചപ്പോഴാണു ചിത്രകലയെക്കുറിച്ചു തനിക്കൊന്നുമറിയില്ലല്ലോ എന്ന് ആമിര്‍ ഒാര്‍ത്തത്. 'താരേ സമീന്‍ പറില്‍ കൂട്ടചിത്രരചനാ രംഗത്ത് അഭിനയിച്ചതു മാത്രമാണ് ആകെയുള്ള മുന്‍കാല പരിചയം. ആരുണ്ടു ചിത്രകല പഠിപ്പിക്കാന്‍ പറ്റിയ ഗുരുവെന്നു തലപുകഞ്ഞാലോചിച്ചപ്പോഴാണു മസില്‍മാന്‍ സല്‍മാന്‍ ഖാന്റെ മുഖം മനസ്സില്‍ തെളിഞ്ഞത്. പിന്നെ, ആലോചിക്കാനെന്തിരിക്കുന്നു ? നേരെ പോയി സല്ലുവിന്റെ ശിഷ്യനായി. ഭാഗ്യത്തിനു ദക്ഷിണ വയ്ക്കാന്‍ പറഞ്ഞില്ല. അല്ലെങ്കില്‍ ''ഓട്ടക്കീശയില്‍ എന്തുണ്ട്... എന്നു ഡയലോഗ് അടിക്കേണ്ടിവന്നേനെ.

എന്തായാലും ഏതാനും ആഴ്ചകളിലെ പരിശീലനം കൊണ്ടു തന്നെ ശിഷ്യന്‍ മിടുക്കനായെന്നാണു കേള്‍വി. ക്ളാസിനൊടുവിലെ പരീക്ഷ എന്നതു പോലെ പരിശീലനം കഴിഞ്ഞ് ഉഗ്രനൊരു ചിത്രം വരച്ചു ഗുരുവിനു സമ്മാനിച്ചു ആമിര്‍. സല്‍മാന്‍ അതു ഭംഗിയായി ചുമരില്‍ തൂക്കിയിട്ടുണ്ടത്രെ. ഇവര്‍ തമ്മിലുള്ള കൊടുക്കല്‍വാങ്ങലുകള്‍ മുന്‍പും നടന്നിട്ടുണ്ടെന്ന് ഇപ്പോള്‍ ആമിര്‍ പറയുമ്പോഴല്ലേ അറിയുന്നത്. സല്‍മാന്‍ വരച്ചു നല്‍കിയ ഗജിനി സ്കെച്ച് ആമിര്‍ സ്വീകരണമുറിയില്‍ തൂക്കിയിട്ടുണ്ടത്രെ.

എന്തായാലും അഭിനയപ്പണി പോയാലും ഇരുവര്‍ക്കും ചിത്രം വരച്ചു വിറ്റു ജീവിച്ചുപോകാം എന്ന കമന്റിനപ്പുറം ബോളിവുഡ് മാതൃകയാക്കേണ്ട ഒരു പാഠമുണ്ട് ഇതില്‍. ബോക്സോഫിസിലെ മല്‍സരത്തിനിടയിലും പരസ്പരം പഠിക്കാന്‍ ഒരുപാടു കാര്യങ്ങളുണ്ടെന്ന പ്രഫഷനല്‍ പാഠം.

സല്‍മാനെയും ആമിറിനെയും കുറിച്ച് ഇത്രയും പറഞ്ഞുവന്നപ്പോള്‍ ഖാന്‍ ത്രയത്തിലെ മറ്റൊരാളായ ഷാറുഖിനെക്കുറിച്ചു പറയാതിരിക്കുന്നതെങ്ങനെ. സഞ്ജീവ് കപൂര്‍ പുതുതായി തുടങ്ങുന്ന ഫുഡ് സ്പെഷല്‍ ചാനല്‍ 'ഫുഡ് ഫുഡിന്റെ അംബാസഡറാണു മാധുരി ദീക്ഷിത്. 'ഝലക് ദിഖ്ലാ ജാ എന്ന പരിപാടിയുടെ ജഡ്ജിങ് ടീമംഗം കൂടിയായ മാധുരി ചാനലിനു വേണ്ടിയുള്ള പ്രചാരണപ്രവര്‍ത്തനങ്ങളില്‍ സജീവമാണിപ്പോള്‍.

ഇതും ഷാറുഖ് ഖാനും തമ്മിലെന്തു ബന്ധം എന്നല്ലേ ആലോചിക്കുന്നത്. ഇതിനിടെ ഒരു ചോദ്യം വന്നു മാധുരിയോട്. മൂന്നു ഖാന്‍മാരില്‍ ആര്‍ക്കു വേണ്ടി പാചകം ചെയ്യാനാണു കൂടുതല്‍ ഇഷ്ടം, എന്തു കൊണ്ട്? ഉടന്‍ വന്നു മാധുരിയുടെ മറുപടി: ''ഷാറുഖ് ഖാന്‍! വിശദീകരണം കേട്ടപ്പോഴാണ് എല്ലാവരും ആര്‍ത്തുചിരിച്ചത്. ഏറ്റവും മോശം ഭക്ഷണം പോലും 'ഉഗ്രന്‍, അത്യുഗ്രന്‍ എന്നു പറഞ്ഞ് അഭിനന്ദിക്കാന്‍ ഷാറുഖിനേ കഴിയൂ. എന്തായാലും ആമിറിനും സല്‍മാനും ചിത്രകലയോടുള്ള തല്‍പര്യം പോലെതന്നെ പ്രശസ്തമാണു ഷാറുഖിന്റെ പാചകവൈദഗ്ധ്യവും.

ആമിറിനു സല്‍മാന്‍ ഖാനോടു സൌഹൃദമാണെങ്കിലും സല്ലുവിന്റെ മുന്‍ കൂട്ടുകാരിയും ഇപ്പോള്‍ അഭിഷേക് ബച്ചന്റെ ഭാര്യയുമായ ഐശ്വര്യാ റായിയോട് അത്ര നല്ല ബന്ധമല്ലെന്നും എല്ലാവര്‍ക്കുമറിയാം. ബച്ചന്‍ കുടുംബത്തോടു നല്ല അടുപ്പമാണെങ്കിലും ഐശ്വര്യയുമായി കക്ഷി ചെറിയൊരു ശീതസമരത്തിലായിരുന്നു ഇതുവരെ.

'മംഗള്‍ പാണ്ഡെയില്‍നിന്ന് ഐശ്വര്യ അവസാനനിമിഷം പിന്മാറിയപ്പോള്‍ തുടങ്ങിയ ശത്രുത. ഒടുവില്‍ ആത്മസുഹൃത്തു റാണി മുഖര്‍ജിയെയാണു പകരം അഭിനയിപ്പിച്ചത്. എത്ര വലിയ ശീതസമരമാണെങ്കിലും അവസാനം വേണമല്ലോ. അക്ഷയ്കുമാറിന്റെയും ട്വിങ്കിളിന്റെയും പത്താം വിവാഹ വാര്‍ഷികാഘോഷത്തിലായിരുന്നു ആമിറിന്റെയും ഐശ്വര്യയുടെയും വെടിനിര്‍ത്തല്‍.

സാധാരണ ഒരു പാര്‍ട്ടിയിലും പത്തു മിനിറ്റിലധികം ചെലവഴിക്കാറില്ല ഐശ്വര്യ. എന്നാല്‍ ആമിറും ഭാര്യ കിരണ്‍ റാവുവും എത്തുന്നുണ്ടെന്നറിഞ്ഞ ഐശ്വര്യ അവര്‍ എത്താന്‍ കാത്തിരുന്നു. എല്ലാവരെയും അത്ഭുതപ്പെടുത്തി അങ്ങോട്ടു ചെന്ന് ആമിറുമായി സംസാരിക്കുകയും ചെയ്തു.

ആമിറും ഭാര്യയും ഇറങ്ങിയ ശേഷമേ ഐശ്വര്യ പാര്‍ട്ടിയില്‍ നിന്നു മടങ്ങിയുള്ളൂ. ഖാന്‍മാരില്‍ നിന്നു മാത്രമല്ല, ഐശ്വര്യയില്‍ നിന്നും ലഭിക്കുന്നു ബോളിവുഡിനു പാഠം: രാഷ്ട്രീയം പോലെത്തന്നെ ബിടൌണിലും സ്ഥിരം ശത്രുക്കളില്ല.