കാസനോവ പരാജയപ്പെട്ടത് ജാതകവിധി -റോഷന്‍ ആന്‍ഡ്രൂസ്
റോഷന്‍ ആന്‍ഡ്രൂസ് ശുഭാപ്തി വിശ്വാസിയാണ്. വൈവിധ്യമാര്‍ന്ന വിഷയങ്ങള്‍ക്ക് ചലച്ചിത്ര ഭാഷ്യം നല്‍കുന്നതില്‍ റോഷന്‍ ആന്‍ഡ്രൂസ് ശ്രദ്ധപതിപ്പിക്കുന്നു. ഓരോ സിനിമകളിലും വ്യത്യസ്തത വേണമെന്ന് ആഗ്രഹിക്കുന്ന റോഷന്‍ ആന്‍ഡ്രൂസിനെ ആരോപണങ്ങളുടെ മുള്‍മുനയില്‍ നിര്‍ത്തിയത് കാസനോവയാണ്. നാലുവര്‍ഷത്തെ പ്രയത്‌നത്തിന്റെ ഫലമായി ഒരുപാട് വൈതരണികളെ അതിജീവിച്ചാണ് കാസനോവയെന്ന ബിഗ്ബജറ്റ് ചിത്രം പൂര്‍ത്തിയാക്കിയത്.
മോഹന്‍ലാല്‍ നായകനായ കാസനോവയ്ക്ക് പരാജയം ഏറ്റുവാങ്ങേണ്ടി വന്നപ്പോള്‍ ഏറ്റവും കൂടുതല്‍ വിചാരണയ്ക്ക് വിധേയനായത് റോഷന്‍ ആന്‍ഡ്രൂസാണ്. നോട്ട്ബുക്കിലൂടെ സംവിധായകന്റെ മേലങ്കിയണിഞ്ഞ റോഷന്‍ ആഡ്രൂസ് മോഹന്‍ലാലിന് വേറിട്ട മുഖം നല്‍കിയ ഉദയനാണ് താരം, ഇവിടം സ്വര്‍ഗമാണ് തുടങ്ങിയ ചിത്രങ്ങളിലൂടെയാണ് കാസനോവയിലെത്തിയത്.
ഇപ്പോള്‍ റോഷന്‍ ആന്‍ഡ്രൂസ് പൃഥ്വിരാജിനെ കേന്ദ്ര കഥാപാത്രമാക്കി കുറ്റാന്വേഷണത്തിന്റെ വ്യത്യസ്തമായ തലങ്ങളാണ് മുംബൈ പോലീസില്‍ അനാവരണം ചെയ്യുന്നത്.
എറണാകുളത്തെ കാക്കനാട്ടുള്ള പ്രകൃതി അപ്പാര്‍ട്ട്‌മെന്റ്‌സില്‍ ചിത്രീകരണം നടക്കുന്ന മുംബൈ പോലീസിന്റെ സെറ്റിലാണ് റോഷന്‍ ആന്‍ഡ്രൂസിനെ കണ്ടത്. പൃഥ്വിരാജും സുകുമാരിയും തമ്മിലുള്ള സീന്‍ ചിത്രീകരിക്കുന്ന തിരക്കിലായിരുന്നു റോഷന്‍. ചിത്രീകരണത്തിന്റെ ഇടളേവയില്‍ സിനിമാമംഗളത്തിന്റെ വായനക്കാരുമായി റോഷന്‍ ആന്‍ഡ്രൂസ് സംസാരിക്കുകയാണ്.
? പുതിയ ചിത്രമായ മുംബൈ പോലീസിനെക്കുറിച്ച്.
ഠ പതിവുപോലെ വ്യത്യസ്തമായ വിഷയമാണ് മുംബൈ പോലീസിലൂടെ ഞാന്‍ പറയുന്നത്. ഇന്‍വെസ്റ്റിഗേഷന്റെ സസ്‌പെന്‍സും ത്രില്ലറും നിറഞ്ഞ വഴിയിലൂടെയാണ് മുംബൈ പോലീസ് കടന്നുപോകുന്നത്. നോട്ട്ബുക്ക് ടീനേജിന്റെ കഥയാണെങ്കില്‍ ഉദയനാണ് താരം സിനിമയെക്കുറിച്ചും ഇവിടം സ്വര്‍ഗമാണ് കാര്‍ഷിക വിഷയവുമാണ് കൈകാര്യം ചെയ്തത്. കാസനോവയാകട്ടെ വ്യത്യസ്തമായ കഥയായിരുന്നു. ഇപ്പോള്‍, മുംബൈ പോലീസില്‍ പോലീസ് ഡിപ്പാര്‍ട്ടുമെന്റുമായി ബന്ധപ്പെട്ട കഥയാണ് പറയുന്നത്. ആന്റണി മോസസെന്ന അസി. പോലീസ് കമ്മീണഷറായാണ് പൃഥ്വിരാജ് അഭിനയിക്കുന്നത്. ആര്യന്‍ ജോണ്‍ ജേക്കബെന്ന മറ്റൊരു പോലീസ് കമ്മീഷണറായി ജയസൂര്യ അഭിനയിക്കുന്നു. ഓരോ സീനുകളിലും സസ്‌പെന്‍സ് ഉള്ളതിനാല്‍ മുംബൈ പോലീസിനെക്കുറിച്ച് കൂടുതലൊന്നും പറയാന്‍ ആഗ്രഹിക്കുന്നില്ല.
? റോഷന്‍ ആന്‍ഡ്രൂസിന്റെ കരിയറിനെ പ്രതികൂലമായി ബാധിച്ച കാസനോവയുടെ പരാജയം.
ഠ കാസനോവ സാമ്പത്തികമായി പരാജയപ്പെട്ട സിനിമയാണ്. ഞാന്‍ ഒരുപാട് പ്രതീക്ഷയോടെയാണ് കാസനോവ ചെയ്തത്. പക്ഷേ പരാജയപ്പെടണമെന്നത് കാസനോവ എന്ന ചിത്രത്തിന്റെ ജാതകമാണെന്ന് ഞാന്‍ വിശ്വസിക്കുന്നു.
? കാസനോവ പൂര്‍ത്തിയാക്കാന്‍ നാലുവര്‍ഷം വേണ്ടിവന്നില്ലേ.
ഠ അതെ, സാങ്കേതികമായി നാലുവര്‍ഷം കാസനോവ ചിത്രീകരിക്കാന്‍ വേണ്ടിവന്നെങ്കിലും കൃത്യമായി പറഞ്ഞാല്‍ എഴുപത്തിയഞ്ചു ദിവസം മാത്രമാണ് ഷൂട്ടിംഗ് നടന്നത്. നാലുവര്‍ഷത്തിനുള്ളില്‍ സിനിമയിലുണ്ടായിരുന്ന പല ആളുകളും മാറി. എന്റെ ഫിലിം മേക്കിംഗ് രീതിയില്‍ ഒരുപാട് ടെന്‍ഷനുണ്ടാക്കിയ ചിത്രമായിരുന്നു.
? കാസനോവയുടെ പരാജയം നല്‍കിയ പാഠം.
ഠ കാസനോവ ഒരുപാട് മറക്കാനാവാത്ത അനുഭവങ്ങള്‍ നല്‍കിയ ചിത്രമാണ്. യഥാര്‍ത്ഥത്തില്‍ ഞാന്‍ ചെയ്ത സിനിമകളില്‍ ഞാനേറെ ഇഷ്ടപ്പെടുന്ന ചിത്രം കാസനോവയാണ്. കാസനോവ പോലുള്ള ചിത്രം ചെയ്ത എനിക്ക് ഇനി, എത്ര വലിയ ബിഗ് ബജറ്റ് ചിത്രവും അനായാസമായി സംവിധാനം ചെയ്യാന്‍ കഴിയും. കാസനോവയുടെ വിഷ്വല്‍ ബ്യൂട്ടി എല്ലാവര്‍ക്കും ഇഷ്ടപ്പെട്ടിട്ടുണ്ട്. കഴിഞ്ഞ ഇരുപതുവര്‍ഷത്തെ മലയാളസിനിമയെ വിലയിരുത്തുമ്പോള്‍ പല ബിഗ്ബജറ്റ് ചിത്രങ്ങളും പരാജയപ്പെട്ടിട്ടുണ്ട്. അതിനൊക്കെ പല കാരണങ്ങളുമുണ്ട്. കാസനോവയെക്കുറിച്ച് ആളുകള്‍ ഒരുപാട് എക്‌സ്‌പെക്റ്റ് ചെയ്തു. ഞാന്‍ ചെയ്ത മറ്റ് സിനിമകളിലൊക്കെയുണ്ടായിരുന്ന ആളുകളുടെ എക്‌സ്‌പെക്‌റ്റേഷന്‍ മോഹന്‍ലാല്‍ നായകനായ കാസനോവയിലും ഉണ്ടായത് സ്വാഭാവികം മാത്രം.
? കാസനോവയെന്ന ചിത്രം ചെയ്തതിലൂടെ ഏറ്റവും കൂടുതല്‍ പ്രതിഫലം പറ്റി പ്രൊഡ്യൂസറെ വഴിയാധാരമാക്കിയെന്ന ആരോപണം റോഷനെതിരെ ഉയര്‍ന്നിരുന്നുവല്ലോ.
ഠ ഒരു ജോലിയും ചെയ്യാതെ സിനിമയെന്തെന്നു പോലും അറിയാത്തവരാണ് എനിക്കെതിരെ ആരോപണം ഉന്നയിച്ചത്. എന്തെങ്കിലും ചെയ്യുമ്പോഴാണല്ലോ ആരോപണം ഉന്നയിക്കുന്നത്. സിനിമയില്‍ നിരന്തരം വര്‍ക്ക് ചെയ്യുന്നവര്‍ പറഞ്ഞാല്‍ മനസിലാക്കാമായിരുന്നു. പിന്നെ ആരോപണങ്ങളെ ഞാന്‍ പുഞ്ചിരിയോടെയാണ് സ്വീകരിക്കുന്നത്. കാരണം ആരോപണങ്ങള്‍ ഉണ്ടാവുമ്പോഴാണ് എനിക്ക് വളര്‍ച്ചയുണ്ടാകുന്നത്. പ്രൊഡ്യൂസറെ ഞാനൊരിക്കലും കുറ്റപ്പെടുത്തില്ല. കാരണം ഏതൊരു ഉല്പന്നമാണെങ്കിലും മാര്‍ക്കറ്ററിഞ്ഞ് പുറത്തിറക്കണം. കാസനോവ നാലുവര്‍ഷം മുമ്പ് പുറത്തിറങ്ങിയിരുന്നുവെങ്കില്‍ സാമ്പത്തിക വിജയം നേടുമായിരുന്നു.
? മോഹന്‍ലാല്‍ താങ്കളെ കുറ്റപ്പെടുത്തിയിരുന്നോ.
ഠ ഒരിക്കലുമില്ല. കാസനോവയുടെ തുടക്കം മുതല്‍ ഒടുക്കംവരെ ലാലേട്ടന്‍ ഒരു വാക്കുപോലും മോശമായി പറഞ്ഞിട്ടില്ല. കാസനോവ പുറത്തിറങ്ങിയിട്ടും പരാജയം ഏറ്റുവാങ്ങേണ്ടി വന്നപ്പോഴും കാസനോവ നല്ല സിനിമയെന്നാണ് ലാലേട്ടന്‍ പറഞ്ഞത്. സാധാരണ ഒരു സിനിമ പരാജയപ്പെട്ടാല്‍ എല്ലാവരും സംവിധായകന്റെ തലയിലാണ് പരാജയകാരണം കെട്ടിവയ്ക്കുന്നത്. എന്നാല്‍ ലാലേട്ടന്‍ എനിക്ക് ഊര്‍ജം മാത്രമാണ് നല്‍കിയത്. മാത്രമല്ല ലാലേട്ടന്‍ പലപ്പോഴും പരസ്യമായി എന്നെ അഭിനന്ദിക്കാനും തയാറായിട്ടുണ്ട്. സിനിമയുടെ വിവിധ മേഖലകളില്‍ പ്രതിഭ തെളിയിച്ചവരാണ് കാസനോവയില്‍ ഒന്നിച്ചത്. എന്നിട്ടും കാസനോവ പരാജയപ്പെട്ടത് ആ ചിത്രത്തിന്റെ ജാതകവിധി തന്നെയാണ്.
? കാസനോവ പരാജയപ്പെട്ടപ്പോള്‍ റോഷനെതിരെ ഉയര്‍ന്നുവന്ന ആരോപണങ്ങളില്‍ ഏറെ വിഷമം തോന്നിയ നിമിഷം.
ഠ ആരോപണങ്ങളൊന്നും എന്നെ വിഷമിപ്പിക്കാറില്ല. അതൊക്കെ സ്വാഭാവികം മാത്രം. പക്ഷേ, സോഷ്യല്‍ നെറ്റ്‌വര്‍ക്കുകളിലൂടെയുള്ള
പ്രതികരണങ്ങളാണ് എന്നെ വിഷമിപ്പിച്ചത്. ഫെയ്‌സ്ബുക്കിലൊക്കെ വളരെ മോശമായാണ് പലരും പ്രതികരിച്ചത്. ഇതില്‍ ചില പ്രതികരണങ്ങള്‍ കണ്ടപ്പോള്‍ വല്ലാത്ത വിഷമം തോന്നി.
? പ്രേക്ഷകന്റെ പള്‍സറിയാതെ സിനിമ ചെയ്യുമ്പോള്‍ പരാജയം സ്വാഭാവികമല്ലേ.
ഠ ആളുകളുടെ ടേസ്റ്റ് കണ്ടുപിടിക്കാന്‍ ഇതേവരെ ഒരു സിനിമാക്കാരനും കഴിഞ്ഞിട്ടില്ല. സിനിമാ തിയേറ്ററിലെത്തുന്ന അഞ്ഞൂറു പേരുടെയും അഭിരുചിയും കാഴ്ചപ്പാടുമൊക്കെ വിഭിന്നമായിരിക്കും. ഇപ്പോഴത്തെ സാഹചര്യത്തില്‍ ഡിഫറന്റ് ആറ്റിറ്റിയൂഡിലാണ് സിനിമയെ ഓരോരുത്തരും കാണുന്നത്. ആസ്വാദനത്തില്‍ പോലും ഒട്ടേറെ മാറ്റങ്ങള്‍ ഉണ്ടായിട്ടുണ്ട്. എം.ടി.യുടെ തിരക്കഥ വിറ്റുപോകുന്നതിനേക്കാള്‍ എത്രയോ ഇരട്ടിയാണ് ഉത്സവപ്പറമ്പുകളില്‍ പോലും പൈങ്കിളിക്കഥകള്‍ വിറ്റഴിയുന്നത്. ഇത്തരമൊരു സമീപനം സിനിമകളിലും ആളുകള്‍ കാണിക്കുന്നുണ്ട്.
? മലയാളസിനിമയിലെ പുതിയ പരീക്ഷണങ്ങളെക്കുറിച്ച്.
ഠ മലയാളസിനിമയില്‍ എല്ലാക്കാലത്തും പുതിയ വഴിയിലൂടെ സഞ്ചരിക്കുന്ന സിനിമകള്‍ ഉണ്ടായിട്ടുണ്ട്. ഭരതന്റെ തകരയും കെ.എസ്. സേതുമാധവന്റെ വേനല്‍ക്കിനാവുകളും അക്കാലത്തെ പുത്തന്‍ ആശയരീതിയിലുള്ള സിനിമകളാണല്ലോ.
പണ്ടുകാലത്ത് കാണിച്ചിരുന്ന റേപ്പ് ന്യൂജനറേഷന്‍ കാലത്ത് മറ്റൊരു രീതിയിലാണ് കാണുന്നത്. സെക്‌സ് എക്കാലത്തും ഉള്ളതാണ്. പുതിയ ഭാഷയില്‍ പുതിയ രീതിയില്‍ അവതരിപ്പിക്കുമ്പോഴാണ് കൂടുതല്‍ ശ്രദ്ധിക്കപ്പെടുന്നത്. മലയാളസിനിമ മാറ്റത്തിന്റെ വഴിയിലൂടെ കടന്നുപോകുകയാണ്.
? റോഷന്റെ പുതിയ ചിത്രങ്ങള്‍.
ഠ മുംബൈ പോലീസ് കഴിഞ്ഞതും ഞാന്‍ ഹിന്ദി ചിത്രത്തില്‍ ജോയിന്‍ ചെയ്യും. കാസനോവയുടെ ട്രീറ്റ്‌മെന്റാണ് ഹിന്ദിയിലേക്ക് വഴിതുറന്നത്. ഞാനാദ്യമായി സംവിധാനം ചെയ്യുന്ന ഹിന്ദി ചിത്രത്തിന്റെ താരനിര്‍ണയം പൂര്‍ത്തിയാകുന്നതേയുള്ളൂ. എന്റെ ഹിന്ദി ചിത്രത്തിന്റെ നിര്‍മാതാവ് ഖേതന്‍ ഷായാണ്.
-
Home 
Publications 
Calendar
pani palumo...